🚨 दरोडा टाकण्याच्या तयारीत असणाऱ्या सात जणांच्या टोळीवर पोलिसांची झडप

चोपडा (प्रतिनिधी) – दरोडा टाकण्याच्या तयारीत असलेल्या सात जणांच्या टोळीवर चोपडा शहर पोलिसांनी मध्यरात्री झडप टाकत मोठी कारवाई केली आहे. या कारवाईत पोलिसांनी दोन लोडेड गावठी पिस्तुले, दोन तलवारी, मोबाईल फोन, रोख रक्कम आणि चारचाकी वाहन असा एकूण १३ लाख १० हजार रुपयांचा मुद्देमाल जप्त केला आहे.

ही कारवाई पोलिस निरीक्षक मधुकर साळवे यांच्या नेतृत्वाखाली करण्यात आली. शिरपूर बायपास रोडवर रात्री साडेदोनच्या सुमारास पोलिसांना मिळालेल्या गुप्त माहितीच्या आधारे पथकाने संशयास्पद पांढऱ्या स्विफ्ट डिझायर कार (MH-26 CH-1733) ची पाहणी केली. रणगाडा चौकाजवळ वाहन दिसताच पोलिसांनी वेढा घालत पळून जाण्याचा प्रयत्न करणाऱ्या सर्व सात संशयितांना ताब्यात घेतले.

गाडीची झडती घेतली असता दोन संशयितांकडे लोडेड गावठी पिस्तुले, तर गाडीतून दोन तलवारी व एक रिकामे मॅगझिन आढळले.

अटक करण्यात आलेले आरोपी पुढीलप्रमाणे आहेत :

• दिलीपसिंह हरिसिंह पवार (३२, नाथनगर, नांदेड)
• विक्रम बाळासाहेब बोरगे (२४, वैजापूर, संभाजीनगर)
• अनिकेत बालाजी सूर्यवंशी (२५, नवामोंढा, नांदेड)
• अमनदीपसिंह अवतारसिंह राठोड (२५, मगनपूरा, नांदेड)
• सदामहुसेन मोहम्मद अमीन (३३, इतवारा, नांदेड)
• अक्षय रविंद्र महाले (३०, भावसार गल्ली, चोपडा)
• जयेश राजेंद्र महाजन (३०, भाट गल्ली, चोपडा)

हे सर्व आरोपी कुख्यात गुन्हेगार असून त्यांच्यावर खून, खुनाचा प्रयत्न, दरोडा, जबरी चोरी, दंगल, दहशत माजवणे व बेकायदा शस्त्र बाळगणे अशा गंभीर गुन्ह्यांची नोंद आहे. काहींवर MPDA कायद्यांतर्गत कारवाईही झालेली असून हे आरोपी अलीकडेच कारागृहातून सुटलेले आहेत.

तपासात असेही उघड झाले आहे की, ही टोळी रस्त्यावर दरोडा टाकण्यासाठी आणि लूटमार करण्याच्या उद्देशाने शस्त्रसज्ज अवस्थेत एकत्र जमली होती. तसेच नांदेड परिसरात हे आरोपी खंडणी वसुली, अपहरण आणि व्हिडिओद्वारे धमकावणे अशा प्रकारांनी दहशत निर्माण करत असल्याची माहिती समोर आली आहे.

या प्रकरणी चोपडा शहर पोलिस ठाण्यात गु.र.नं. ५८१/२०२५ अंतर्गत भा.द.वि. कलम ३१०(४), ३१०(५), शस्त्र अधिनियम १९५९ चे कलम ३/२५, ४/२५ आणि महाराष्ट्र पोलीस कायदा कलम १३५ नुसार गुन्हा दाखल करण्यात आला आहे. सर्व आरोपींना अटक करून न्यायालयात हजर करण्यात आले असून पुढील तपास सुरू आहे.