🗳️ राज्यात आज निवडणुकीचा बिगुल वाजणार? सायंकाळी राज्य निवडणूक आयोगाची पत्रकार परिषद

मुंबई प्रतिनिधी | सनातन सारथी न्यूज

महाराष्ट्रातील रखडलेल्या स्थानिक स्वराज्य संस्थांच्या निवडणुकांचा बिगुल अखेर आज वाजण्याची चिन्हं दिसत आहेत. राज्य निवडणूक आयोगाने आज सायंकाळी ५ वाजता पत्रकार परिषद बोलावली असून, त्यात आचारसंहिता लागू होण्याची शक्यता वर्तवली जात आहे.

राज्यातील महानगरपालिका, जिल्हा परिषद आणि पंचायत समित्या यांच्या निवडणुका विविध कारणांमुळे गेल्या काही महिन्यांपासून लांबणीवर टाकण्यात आल्या होत्या. मात्र आता आयोगाने सर्व प्रशासकीय तयारी पूर्ण केली असून, आजच्या पत्रकार परिषदेत अधिकृत निवडणूक कार्यक्रम आणि तारखा जाहीर होण्याची शक्यता व्यक्त केली जात आहे.

दरम्यान, राजकीय पक्षांनीही आपल्या प्रचार मोहिमांना वेग दिला आहे. उमेदवार निश्चिती, बैठका आणि रणनीती ठरवण्याचे काम युद्धपातळीवर सुरू आहे. सत्ताधारी आणि विरोधक या दोघांकडूनही मोठ्या प्रमाणावर हालचाली वाढल्या असून, राज्यात पुन्हा एकदा रंगणार राजकीय कुरघोडीचा थरार अशी उत्सुकता राजकीय वर्तुळात दिसत आहे.

मतदारांमध्येही निवडणुकीच्या तारखांविषयी उत्सुकता वाढली असून, आजची संध्याकाळ राज्याच्या राजकीय वातावरणात नवचैतन्य आणणारी ठरण्याचे संकेत तज्ज्ञांकडून व्यक्त केले जात आहेत.

📍 अधिकृत घोषणा आणि निवडणूक कार्यक्रमासाठी ‘सनातन सारथी न्यूज’वर लक्ष ठेवा.