जळगावात उघड्यावरील बेकायदेशीर मांस विक्रीविरोधात ‘हिंदु जनजागृती समिती’ आक्रमक!

जळगांव प्रतिनिधी– शहरातील विविध नागरी वस्त्यांमध्ये आणि मुख्य रस्त्यांच्या कडेला सुरू असलेल्या बेकायदेशीर व उघड्यावरील मांस विक्रीविरोधात आता हिंदु जनजागृती समितीने आक्रमक पाऊल उचलले आहे. या अनधिकृत व्यवसायामुळे शहरात भटक्या कुत्र्यांचा हैदोस वाढला असून नागरिकांच्या आरोग्याचा प्रश्न गंभीर बनला आहे. या पार्श्वभूमीवर, समितीच्या वतीने जळगाव शहर महानगरपालिकेच्या माननीय महापौर महोदया, मनपा आयुक्त, जिल्हाधिकारी आणि पोलीस अधीक्षकांना कायदेशीर निवेदन सादर करण्यात आले आहे. पुढील ७ दिवसांत ठोस कारवाई न झाल्यास उच्च न्यायालयात जनहित याचिका (PIL) दाखल करण्याचा आणि तीव्र जनआंदोलन उभारण्याचा इशारा या निवेदनाद्वारे देण्यात आला आहे.

​भटक्या कुत्र्यांचा हैदोस आणि जीवितहानीचा धोका

​निवेदनात नमूद केल्यानुसार, उघड्यावर मांस विक्री करणाऱ्या दुकानांमधून उरलेले मांसाचे तुकडे, रक्त आणि हाडे रस्त्यावर व कचराकुंडीत उघड्यावर टाकून दिली जातात. हे अन्न खाऊन रस्त्यावरील भटके कुत्रे अत्यंत क्रूर आणि हिंस्त्र बनत आहेत. परिणामी, शहरात लहान मुलांवर आणि पादचाऱ्यांवर कुत्र्यांनी जीवघेणे हल्ले केल्याच्या व त्यात नागरिकांचा मृत्यू झाल्याच्या अत्यंत दुर्दैवी घटना घडलेल्या आहेत. या गंभीर प्रकारामुळे जळगावकर नागरिकांच्या जीविताला मोठा धोका निर्माण झाला आहे.

​कायदे आणि मनपा नियमावलीची सर्रास पायमल्ली

​महानगरपालिकेने मांस विक्रीसाठी परवाना (License), बंदिस्त जागा, स्वच्छतेचे निकष आणि कचऱ्याची योग्य विल्हेवाट लावण्याची कडक नियमावली तयार केली आहे. मात्र, या दुकानदारांकडून या सर्व नियमांना धाब्यावर बसवले जात आहे. ‘अन्न सुरक्षा आणि मानके कायदा, २००६’ (FSSAI) तसेच ‘महाराष्ट्र महानगरपालिका अधिनियम’ मधील तरतुदींनुसार निवासी भागात आणि उघड्यावर अशा प्रकारे मांस कापण्यास व विकण्यास सक्त मनाई असतानाही प्रशासनाच्या दुर्लक्षामुळे हा व्यवसाय सर्रास सुरू आहे.

​नागरिकांच्या जगण्याच्या मूलभूत अधिकारांचे (भारतीय संविधानाचे कलम २१) हे थेट उल्लंघन आहे. प्रशासनाने तात्काळ जागे होऊन कारवाई करणे गरजेचे आहे.- हिंदु जनजागृती समिती

​समितीच्या प्रमुख आणि कायदेशीर मागण्या:

• ​तात्काळ दुकाने सील करा: शहरातील नागरी वस्त्यांमध्ये आणि रस्त्यांच्या कडेला सुरू असलेली सर्व अनधिकृत व उघड्यावरील मांस विक्रीची दुकाने त्वरित प्रशासकीय बळाचा वापर करून बंद करण्यात यावीत.
• ​फौजदारी गुन्हे दाखल करा: मनपाच्या नियमांचे आणि न्यायालयाच्या आदेशांचे उल्लंघन करणाऱ्या दुकानदारांवर तात्काळ गुन्हे दाखल करण्यात यावेत.
• ​नियमित गस्त व दंडात्मक कारवाई: मनपाच्या स्वच्छता आणि अतिक्रमण विभागातर्फे शहरात नियमित गस्त घालून, छुप्या पद्धतीने चालणाऱ्या अशा व्यवसायांवर दंडात्मक व जप्तीची कारवाई करण्यात यावी.
• ​कचरा विल्हेवाटीवर कडक निर्बंध: मांस विक्रेत्यांनी त्यांचा कचरा रस्त्यावर टाकल्यास त्यांच्यावर पर्यावरणाची हानी केल्याप्रकरणी कठोर कारवाई व्हावी.

​प्रशासनाला ७ दिवसांचा अल्टिमेटम

​या बेकायदेशीर व्यवसायामुळे नागरी वस्त्यांमध्ये तीव्र दुर्गंधी पसरत असून, संसर्गजन्य आजार पसरण्याचा मोठा धोका निर्माण झाला आहे. महिला, लहान मुले आणि वृद्ध नागरिकांना या परिसरामधून प्रवास करणे असह्य झाले आहे. जळगाव शहर महानगरपालिका प्रशासनाने या निवेदनाची गंभीर दखल घेऊन पुढील ७ दिवसांच्या आत ठोस व प्रत्यक्ष कारवाई केली नाही, तर तीव्र जनआंदोलन उभारण्यात येईल. तसेच, नागरिकांच्या सुरक्षेसाठी माननीय उच्च न्यायालयात जनहित याचिका (PIL) दाखल करण्यात येईल, ज्याची सर्वस्वी जबाबदारी मनपा प्रशासनाची राहील, असा स्पष्ट इशारा हिंदु जनजागृती समितीने दिला आहे.