📢 अत्याचार प्रतिबंधक अधिनियमाच्या अंमलबजावणीचा आढावा – अपर मुख्य सचिवांच्या अध्यक्षतेखाली बैठक

जळगाव | अनुसूचित जाती व अनुसूचित जमाती अत्याचार प्रतिबंधक अधिनियम, 1989 च्या प्रभावी अंमलबजावणीचा आढावा घेण्यासाठी आज मा. अपर मुख्य सचिव (गृह), महाराष्ट्र राज्य यांच्या अध्यक्षतेखाली दूरदृश्य प्रणालीद्वारे बैठक घेण्यात आली.

या बैठकीस जळगाव जिल्ह्याच्या समाजकल्याण विभागाच्या सहायक आयुक्त श्रीमती अनिता राठोड उपस्थित होत्या. त्यांनी जळगाव जिल्ह्यातील या अधिनियमाच्या अंमलबजावणीसंबंधी सविस्तर माहिती सादर केली.

बैठकीदरम्यान जिल्ह्यातील प्रलंबित प्रकरणांची स्थिती, तक्रारींचे निवारण, पीडितांना दिल्या जाणाऱ्या आर्थिक व कायदेशीर मदतीची अंमलबजावणी, तसेच विविध शासकीय विभागांमधील समन्वय यावर सविस्तर चर्चा करण्यात आली.

अपर मुख्य सचिवांनी अधिनियमाच्या अंमलबजावणीस गती देण्यासाठी आवश्यक ती कार्यवाही तातडीने करण्याच्या सूचना दिल्या. तसेच, पीडित व तक्रारदारांना न्याय मिळवून देण्यासाठी प्रशासनाने संवेदनशील व सक्रिय भूमिका घ्यावी, असेही त्यांनी सांगितले.

या बैठकीमुळे अनुसूचित जाती व अनुसूचित जमाती अत्याचार प्रतिबंधक अधिनियमाच्या अंमलबजावणीत अधिक प्रभावी समन्वय साधला जाईल, असा विश्वास व्यक्त करण्यात आला.