धरणगाव तालुक्यातील साळवे गावातील एका हृदयस्पर्शी घटनेत मुलीने आपल्या आईच्या अंत्यसंस्काराची सर्व धार्मिक विधी स्वतः पार पाडत समाजासमोर एक नवा आदर्श ठेवला. आईच्या निधनानंतर कन्येने मृतदेहाला जलदान केले आणि अंत्यसंस्काराच्या वेळी चितेला अग्नीडाग दिला.
साळवे येथील संजय रामदास बाविस्कर यांच्या सासुबाई कै यशोदाबाई गोकुळ अहिरे यांचे काल रात्री नऊ वाजता देहवसान झाले. त्यांना रेखा बाविस्कर ही एकच मुलगी होती. तिनेच पालन पोषण केले. व अंत्यसंस्काराची संपूर्ण जबाबदारी पार पाडली.
परंपरेनुसार अंत्यसंस्काराचे विधी प्रामुख्याने पुत्राकडून केले जातात. मात्र या कुटुंबात पुत्र नसल्याने तसेच आईशी असलेल्या भावनिक नात्यामुळे कन्येनेच सर्व विधी करण्याचा निर्णय घेतला. तिच्या या निर्णयाला नातेवाईकांनी आणि उपस्थित ग्रामस्थांनीही पाठिंबा दिला.
अंत्ययात्रा शांततेत पार पडली. स्मशानभूमीत विधी सुरू असताना उपस्थितांचे डोळे पाणावले होते. धार्मिक मंत्रोच्चारांदरम्यान कन्येने अत्यंत धैर्याने आणि श्रद्धेने आईच्या चितेला अग्नीडाग दिला. त्या क्षणी वातावरण गंभीर आणि भावनात्मक झाले होते.
या घटनेमुळे समाजातील रूढी-परंपरांबाबत सकारात्मक चर्चा सुरू झाली आहे. मुलगीही पुत्राइतकीच सर्व जबाबदाऱ्या पार पाडू शकते, हे या घटनेतून पुन्हा एकदा अधोरेखित झाले आहे. अनेकांनी या कन्येच्या धैर्याचे आणि निर्णयाचे कौतुक केले.
या प्रसंगाने स्त्री-पुरुष समानतेचा संदेश देत समाजाला अंतर्मुख करणारा विचार दिला आहे.
