📰 मॉलच्या बाथरूममध्ये तरुणीचे व्हिडिओ चित्रण करणारा अल्पवयीन मुलगा ताब्यात.

जळगाव (प्रतिनिधी):शहरातील एका नामांकित मॉलमध्ये तरुणीचा बाथरूममधील व्हिडिओ चोरून चित्रित केल्याची धक्कादायक घटना शुक्रवारी उघडकीस आली आहे. या प्रकरणात १७ वर्षीय अल्पवयीन मुलावर विनयभंग आणि गोपनीयतेचा भंग केल्याचा गुन्हा दाखल करण्यात आला असून, पोलिसांनी त्याला ताब्यात घेऊन सुधारगृहात रवानगी केली आहे.

मिळालेल्या माहितीनुसार, ठाणे येथील १९ वर्षीय तरुणी दिवाळी सुट्टीसाठी मामाकडे जळगावात आली होती. शुक्रवारी सायंकाळी ती आई आणि मावशीसोबत गोविंदा स्टॉपजवळील एका मॉलमध्ये सिनेमा पाहण्यासाठी गेली होती. दरम्यान, बाथरूमला गेल्यानंतर त्या ठिकाणी उपस्थित असलेल्या एका अल्पवयीन मुलाने आपल्या मोबाईल फोनद्वारे तिचा अर्धनग्न अवस्थेतील व्हिडिओ चोरून रेकॉर्ड केला.

तरुणीला याची वेळेत चाहूल लागल्याने तिने तत्काळ आरडाओरड केली. नागरिकांनी तत्परतेने मुलाला पकडून पोलिसांच्या ताब्यात दिले. या प्रकरणी शनिपेठ पोलिस ठाण्यात गुन्हा नोंदविण्यात आला असून, पोलिस निरीक्षक कावेरी कमलाकर यांच्या मार्गदर्शनाखाली पुढील तपास सुरू आहे.

सदर आरोपी अल्पवयीन असल्याने त्याला शनिवारी सुधारगृहात ठेवण्यात आले असून, रविवारी त्याला बाल न्यायालयासमोर हजर करण्यात आले.

🔹 घटनेमुळे शहरात संतापाचे वातावरण असून, मॉलमधील सुरक्षेवर प्रश्नचिन्ह उपस्थित झाले आहेत.